काठमाडौँ । हरितालिका तिजका अवसरमा पशुपतिनाथ मन्दिर क्षेत्रमा सशस्त्र प्रहरी बल नेपालले स्वास्थ्य, खानेपानी र सुरक्षा प्रदान गरेको छ । यसका लागि सशस्त्र प्रहरीले ८ सय जनशक्ति परिचालन गरेको छ ।

आज बिहान २ बजेबाट नै मन्दिर परिसरमा दर्शनार्थीको व्यवस्थापन, शान्तिसुरक्षा, स्वास्थ्य लगायतको लागि सुरक्षाकर्मी परिचालन गरिएको सशस्त्र प्रहरीले जनाएको छ । मन्दिर परिसरमा नेपाल एपीएफ अस्पताल बलम्बुबाट महिला चिकित्सक र एम्बुलेन्ससहितको मेडिकल टिम परिचालन भएको छ ।

यसैगरी प्रधान कार्यालयबाट खानेपानीको लागि ट्यांकरसहितको टोली पनि रातिदेखिनै खखटिएको छ । पशुपति क्षेत्रको राम मन्दिर नजिक बागमती नदी किनारमा गोताखोरसहितको उद्दार टोलीसमेत तयारी अवस्थामा राखिएको सशस्त्रका सहप्रवक्ता डिएसपी शैलेन्द्र थापाले जानकारी दिए ।

सशस्त्रले सूक्ष्म निगरानिका लागी मन्दिर परिसर र वरिपरिको क्षेत्रमा सादा पोसाकमा समेत व्यापक मात्रामा सुरक्षाकर्मी परिचालन गरिएको छ । मन्दिर वरिपरिका क्षेत्रहरु तिलगंगा, जय बागेश्वरी, गुह्येश्वरी मन्दिर, बिश्वरुपा मन्दिर, गौरीघाटलगायतको क्षेत्रमा समेत आवश्यक शान्ति सुरक्षाका लागि गस्ती बढाइएको छ ।