जिल्ला प्रहरी कार्यालय बैतडीका प्रमुख प्रहरी नायब उपरीक्षक दीपककुमार रायका अनुसार, दशरथचन्द नगरपालिका-५, अला गाउँका जयदेव भट्टको घरको छत फुटाएर तामाका भाँडाकुँडा चोरी गरेको आरोपमा उनीहरूलाई पक्राउ गरिएको हो। उक्त घरमा एक महिनाअघि चोरी भएको थियो।

प्रहरी नायब उपरीक्षक रायले भने, “कार्यपालिका सदस्यकै योजनामा घरको छत फोडेर शृङ्खलाबद्ध चोरी गरेको भेटिएको छ। अर्को घरमा पनि यस्तै प्रकृतिको चोरी भएको छ।” प्रहरीले उनीहरूको साथबाट सुन लगाउने पोते र तामाका भाँडाकुँडा बरामद गरेको छ। बरामद सुन भने आधा काटेर गायब पारिएको प्रहरीले जनाएको छ। घटनाबारे थप अनुसन्धान भइरहेको छ। पक्राउ परेका विनोदराम लोहार २०७९ को स्थानीय तह निर्वाचनमा नेकपा (एमाले)का तर्फबाट वडा सदस्यमा निर्वाचित भएका थिए र पछि नगर कार्यपालिका सदस्यमा मनोनीत भएका थिए।