रसुवाको पासाङ ल्हामु राजमार्ग त्रिशूली नदीको कटानका कारण पूर्ण रूपमा बन्द छ। प्रहरीका अनुसार काठमाडौँबाट नुवाकोट हुँदै स्याफ्रुबेँसी पुग्ने एक लेनको कच्ची वैकल्पिक सडक प्रयोग गर्न सकिनेछ। साथै, टोखा-छहरे सडकखण्डमा राति १० बजेदेखि बिहान ५ बजेसम्म अत्यावश्यक बाहेकका सवारीसाधन सञ्चालनमा रोक लगाइएको छ।

पृथ्वीराजमार्गको कृष्णभीरमा पहिरो खस्दा सडक एकतर्फी मात्र सञ्चालनमा छ भने बेनिघाट रोराङ-१० मा सडक पूर्ण रूपमा बन्द छ। चितवनको नारायणगढ-मुग्लिन सडकखण्डमा पनि पहिरोका कारण अर्को सूचना नभएसम्मका लागि यातायात बन्द गरिएको छ। यसैगरी, बीपी राजमार्गअन्तर्गत काभ्रेपलाञ्चोकका विभिन्न स्थान र अरनिको राजमार्गको धुलिखेल खण्ड पनि पहिरोले अवरुद्ध भएको छ।

गण्डकी प्रदेशका विभिन्न सडकहरू पनि प्रभावित छन्। मनाङको बेँसीसहर-खाङसार सडकमा राति ६ बजेदेखि बिहान ६ बजेसम्म सवारी आवागमन रोकिएको छ भने चामे-बेँसीसहर सडक पूर्ण रूपमा बन्द छ। बागलुङको मध्यपहाडी लोकमार्ग, कालीगण्डकी करिडोर, रोल्पाको घोराही-थवाङ-रुकुम सहिदमार्ग र कालिकोटको कर्णाली राजमार्ग पनि पहिरो र लेदोका कारण अवरुद्ध छन्।

यसका साथै गुल्मी, म्याग्दी, मुस्ताङ, हुम्ला, नवलपरासी पूर्व, पाल्पा, ललितपुर, लमजुङ, तनहुँ र पर्वतका विभिन्न सडक खण्डमा पनि यातायात सञ्चालन हुन सकेको छैन। प्रहरीले जोखिमयुक्त सडकमा अनावश्यक यात्रा नगर्न र स्थानीय प्रशासनको सूचनालाई पालना गर्न सर्वसाधारणलाई आग्रह गरेको छ।