प्रधानमन्त्री शाहले प्रहरीको क्षमता अभिवृद्धिका लागि नीतिगत मार्गदर्शन, कानुनी सहजता, आधुनिक तालिम र पूर्वाधार विकासलाई सरकारले प्राथमिकतामा राखेको स्पष्ट पारे। उनले प्रहरी कर्मचारी, तिनका परिवार र सर्वसाधारणको स्वास्थ्य सेवालाई मध्यनजर गर्दै नेपाल प्रहरी अस्पताललाई मेडिकल कलेजका रूपमा विकास गर्ने योजना रहेको जानकारी दिए।

पछिल्लो समय बढ्दै गएको वित्तीय र साइबर अपराध नियन्त्रणमा सरकार गम्भीर रहेको उल्लेख गर्दै प्रधानमन्त्री शाहले भने, ‘यसका लागि नेपाल प्रहरीको सहकार्यमा राष्ट्र बैंक, इन्टरनेट र टेलिकम सेवाप्रदायक तथा डिजिटल वालेटहरूलाई एक ठाउँमा ल्याई नागरिकका गुनासा थप प्रभावकारी ढंगले सम्बोधन गर्ने व्यवस्था गरिँदै छ।’ साथै, उनले एआई, एरियल सेक्युरिटी एन्ड सपोर्ट युनिट र इन्टिग्रेटेड एन्टी-स्क्याम सेन्टर स्थापनाको तयारी भइरहेको जानकारी दिए।

आफ्नो सन्देशमा प्रधानमन्त्री शाहले भोटेकोशी-त्रिशूलीको विपद् लगायत कर्तव्य निर्वाहका क्रममा ज्यान गुमाएका प्रहरीहरू प्रति श्रद्धाञ्जली अर्पण गरे। उनले ‘राष्ट्रसेवकको असली परीक्षा संकटका बेला हुन्छ’ भन्दै संकटको घडीमा धैर्य, सही निर्णय र कुशल कार्यसम्पादनले नै ठूला विपद् टार्न सकिने बताए।