दिल्लीको एक भवनमा आगलागी हुँदा २७ जनाको ज्यान गयो, १९ बेपत्ता
नयाँ दिल्ली । पश्चिम दिल्लीको बाहिरी इलाका मुन्डका क्षेत्रमा शुक्रबार साँझ एउटा भवनमा लागेको भीषण आगलागीमा परी कम्तीमा २७ जनाको मृत्यु भएको पुष्टि भएको छ । दिल्लीको बाहिरी जिल्ला प्रहरी उपायुक्त (डीसीपी) समीर शर्माले पनि घटनाको पुष्टि गरेका छन् ।
भवनमा लागेको आगो निभाइएको र घाइतेहरूको सञ्जय गान्धी र दीनदयाल उपाध्याय अस्पतालमा उपचार भइरहेको बताए । नागरिक रक्षा विभागले सञ्जय गान्धी मेमोरियल अस्पताल भित्र हेल्प डेस्क स्थापना गरेको जानकारी दिएका छन् ।
आगलागी हुँदा भवनमा ७० भन्दा बढी मानिस थिए र प्रहरीले झ्यालका सिसा फुटाएर मानिसलाई उद्धार गर्न डोरी प्रयोग गरेको थियो ।
भारतको राजधानीको पश्चिममा रहेको मुन्डका मेट्रो स्टेशन नजिकै आगो निभाउन करिब २० वटा दमकल प्रयोग गरिएको थियो । सर्ट सर्किट भएर आगलागी भएको अनुमान गरिएको छ । प्रहरीले घटनासँग सम्बन्धित दुई जनालाई पक्राउ गरेको छ ।
हेल्प डेस्कका अनुसार हालसम्म १९ जना बेपत्ता भएका छन् । जसमध्ये ४ जना पुरुष र १५ जना महिला रहेका छन् । दिल्लीका डेपुटी चिफ फायर अफिसर सुनील चौधरीका अनुसार अहिलेसम्म २७ शव निकालिएको छ ।
#Delhi: मुंडका में भीषण आग से जान बचाने के लिए लोग बिल्डिंग से छलांग लगा रहे थे तो कुछ रस्सी के सहारे कूद रहे थे, क्रेन की भी ली जा रही थी मदद। अभी तक 16 लोगों की मौत की पुष्टि। pic.twitter.com/GZhQycJqii
— NBT Dilli (@NBTDilli) May 13, 2022
प्रारम्भिक जानकारीमा १४ जनाको मृत्यु भएको खबर आएपनि मृतकको संख्या निरन्तर बढिरहेको छ ।
सोही क्रममा दमकलका एक कर्मचारीका अनुसार धेरैजसो शव भवनको दोस्रो तल्लाबाट निकालिएको छ । उनीहरूको टोलीले सम्पूर्ण भवनलाई नियन्त्रणमा लिएको छ । पहिलो तल्लामा लागेको आगो निभाइएको छ । उनले आगो पूर्णरुपमा नियन्त्रणमा आउन अझै ६ घण्टा लाग्न सक्ने बताए ।
प्रतिक्रिया