काठमाडौं । भारतका गायक सिद्धू मुसेवालाको हत्यामा संलग्न व्यक्तिहरू खोज्न भारतीय प्रहरी नेपाल आएको खुलासा भएको छ ।

हत्यामा संग्लग्नलाई पक्राउ गर्न दिल्ली प्रहरीको विशेष टोली शुक्रबार नेपाल आएको भारतीय सञ्चारमाध्यमहरूले जनाएका छन् ।

मुसेवालाको हत्यामा संलग्न हतियारधारीहरू भारतसँग खुला सीमाना रहेको नेपालमा लुकेको हुनसक्ने अनुसन्धान टोलीको निष्कर्ष रहेको बताइएको छ ।

प्रहरी टोली नेपाल आएको भनिएपनि उनीहरू कुन ठाउँमा रहेर हत्यारा खोजिरहेका छन् भन्ने चाहिँ भारतीय सञ्चारमाध्यहरूले खुलाउन सकेका छैनन् ।

पञ्जाबको मन्सा जिल्लास्थित जवाहार्के गाउँमा गत आइतबार पञ्जाबी गीतका गायक मुसेवालाको हत्या भएको थियो ।

पञ्जाब पुलिसले मुसेवालाको हत्यामा संलग्न दुई व्यक्तिलाई पक्राउ गरिसकेका छन् । उनीहरूसँगको बयानका आधारमा थप संग्लग्न खोज्न दिल्लीको प्रहरी टोलीलाई नेपाल पठाइएको भारतीय सञ्चारमाध्यमले जनाएका छन् ।