काठमाडौं । नेपाली कांग्रेसको शेखर कोइराला समूहको भेलाले पाँच बुँदे विभिन्न निर्णय गरेको छ ।

बैठकपछि नेता डा. गोविन्द पोखरेलले सञ्चारकर्मीलाई जानकारी दिँदै यसमा जनजीविकाका सवालहरू पनि जोडिएको बताए ।

काठमाडौंमा शुक्रबार सकिएको भेलाले शेरबहादुर देउवा समग्र पार्टीको सभापति बन्न नसकेको आरोप लगाएको छ ।

साथै, भेलाले भ्रष्टाचार न्युनीकरण, परराष्ट्र नीतिलगायत धेरै विषयमा सरकार उदासिन रहेको निष्कर्ष निकालेको छ ।

यस्ता छन् ५ निर्णय :

१. जनजीविकाका मुद्दामा सरकार गम्भीर बन्न नसकेको । विकास खर्च, लगानीको माहोल, अर्थतन्त्रका सूचकहरू, मल, पुस्तकका विषयमा सरकार उदासिन ।

२. राजनीतिक प्रतिबद्धता : राजश्व अनुसन्धान, सम्पत्ति शुद्धीकरण, राअवि प्रधानमन्त्रीको मातहतबाट हटाउने पार्टीको निर्णयलाई कार्यान्वयन नगरेको ।

३. चरमरुपमा आर्थिक सुशासनको खिल्ली उडाएको र ब्यापकरुपमा नीतिगत भ्रष्टाचार भएको ।

४. परराष्ट्र नीति सबैको साझा बनाउने पहल नगरेको ।

५. सभापति देउवाले विधानअनुसार चल्ने र ४०% महाधिवेशन प्रतिनिधि जस्ले भोट दिएनन् उनीहरूको सभापति हुन नखोजेको देखियो ।

यी सबै मुद्दामा काग्रेसलाई प्रदेश, जिल्ला र पालिका र वस्तीमा परिचालन गर्ने र यी सबै कुरा उठाउने र काग्रेसको छविलाई बलियो बनाउँदै लैजाने शेखर समूहले जनारएकाे छ ।

भेलामा उपसभापति धनराज गुरुङ र महामन्त्री गगन थापा पनि सहभागी थिए ।

देउवा कांग्रेसको नभएर गठबन्धनको सभापति बनेको शेखर समूहको निष्कर्ष