काठमाडौं (एजेन्सी) । उत्तर प्रदेशको नोएडामा अवैध रूपमा बनेको सुपरटेकको ट्वीन टावर आइतबार दिउँसो भत्काइएको छ ।

सेक्टर ९३ ‘ए’ मा बनेको भवन भत्काइएपछि त्यहाँको हजारौं टन फोहोर हटाइने भएको छ । दुई टावरको गरी करिब ८० हजार टन फोहोर जम्मा भएको अनुमान गरिएको छ ।

यसैबीच राति अबेरसम्म आसपासका क्षेत्रमा बसोबास गर्ने करिब एक सय परिवार घर फर्किएका छन् । समाचार एजेन्सी पीटीआईका अनुसार भवन भत्काउनुअघि एमराल्ड कोर्ट र एटीएस भिलेज सोसाइटीका ५ हजार मानिसलाई सुरक्षित स्थानमा सारिएको थियो।

नियमविपरीत भवन निर्माण गरिउको सर्वोच्च अदालतको आदेशपछि आइतबार ती दुई भवन १२ सेकेण्डमा भत्काइएको थियो । जसका लागि ३ हजार ७ सय केजी विष्फोटक पदार्थ खर्च भयो ।

भत्किएको भवनको भग्नावशेष वर ५०० मिटर क्षेत्रदेखि नै कसैलाई जान दिइएको छैन। भवन भत्काइएको समयमा भने ७ जना १०० मिटर भित्र थिए ।