काठमाडौं । धनगढीमा २०औं सत्याग्रह थालेका डा. गोविन्द केसीको स्वास्थ्य अवस्था थप जटिल बन्दै गएको सेती प्रादेशिक अस्पतालले जनाएको छ ।

अस्पतालले आज सूचनामार्फत केसीको स्वास्थ्य अवस्थाबारे जानकारी गराएको हो । उक्त सूचनामा उनको पेटमा अल्सर भई आन्तरिक रक्तश्राव भएको आशंका गरिएको उल्लेख गरिएको छ । उनमा रिंगटा लाग्ने तथा थकान लाग्ने, स्वास फेर्न गार्‍हो, पेट दुख्ने, शरीरका मांसपेशी सुक्ने जस्ता जस्ता समस्या देखिएको छ ।

अस्पतालले मांशपेशी सुक्दै गएको र अल्सर भई रक्तश्रावको शंका भएको हुँदा उनको ज्यान जोखिमा भएकाले अन्य जोखिम हुन सक्ने भन्दै उपचारको लागि बहुबिशेषज्ञ भएको विशिष्टकृत अस्पतालमा स्थानान्तरणको लागि सुझावसमेत दिएको छ। सरकारसँग स्वास्थ्य सेवा सुधारका विभिन्न ७ बुँदे मागसहित केसी ८ दिनदेखि अनसनरत छन् ।