एयरपोर्टको तीन तहको सुरक्षा घेराबाट अपराधी फरार, दुई अधिकृतमाथि अनुसन्धान
काठमाडौं। वैदेशिक रोजगार ठगी कसूरमा कालोसूचीमा परेका श्यामराज पाण्डे त्रिभुवन अन्तर्राष्ट्रिय विमानस्थलभित्रबाटै फरार भएका छन् । तीन घेरामा रहेका विमानस्थलका सुरक्षाकर्मीलाई छक्याएर अपराधी फरार भएपछि गृह मन्त्रालयलाई टाउको दुखाइ भएको छ ।
कात्तिक ७ गते जापान भाग्न लागेका पाण्डेलाई विमानस्थलस्थित अध्यागमनका कर्मचारीले कालोसूचीमा परेको जानकारी हुँदाहुँदै भगाएका हुन् । अध्यागमनमा खटिएका अधिकृत सन्तोष सुवेदीले राहदानी नं. १२३४३४१२ बाहक पाण्डेलाई भगाएको भन्दै अध्यागमन विभागले सुवेदी र अर्का अधिकृत गणेशविक्रम शाहलाई छानबिनमा तानेको छ ।
त्रिभुवन अन्तर्राष्ट्रिय विमानस्थलस्थित अध्यागमन डेस्कजस्तो संवेदनशील जिम्मेवारीमा बसेका अधिकृतले अपराधिक समूहसँग साँठगाँठ गरेको पाइएकाले छानबिनमा तानेको अध्यागमन विभाग स्रोतले जनाएको छ ।
दुवै अधिकृतलाई विभागमा तानेर अनुसन्धान भइरहेको विभाग स्रोतले जनाएको छ । ‘हामी अनुसन्धानकै क्रममा छौं । विभागका एक अधिकारीले भने, ‘सन्तोष सुवेदी भन्ने अधिकृतले कालोसूचीमा परेको पाण्डेलाई प्रस्थान कक्षको ९ नम्बर डेस्कसम्म सँगै लगेको, सम्बन्धित डेस्क अफिसरसँग २/३ चरण कुरा गराएर कालोसूचीमा परेको भेटिएपछि प्रस्थान कक्षबाट भ–याङ्गसम्म छाडेर भगाएको देखिएको छ ।’
कुनै व्यक्ति कालोसूचीमा परेको भेटिएमा तत्कालै प्रहरीलाई खबर गरेर बुझाउनु पर्नेमा अधिकृत सुवेदीले अर्का अधिकृत गणेशविक्रम शाहसँग मिलेर अपराधी पाण्डेलाई भगाएको अध्यागमन विभागको आरोप छ ।
छानबिन नसकिएकाले त्यसबारे यही भन्न नसक्ने विभागले जनाएको छ ।
आरोपित अधिकृत शाहले भने कालोसूचीमा रहेका पाण्डे भाग्नुमा आफ्नो दोष नभएको दाबी गरेका छन् । उनले अर्का अधिकृत सन्तोष सुवेदीले श्यामराज पाण्डेलाई चिनजानको साथी भनेर आफ्नो डेस्कमा ल्याएको स्वीकारेका छन् । विभागले कालोसूचीमा राखेकाले तपाईं विदेश जान पाउनु हुन्न भनेर प्रहरीलाई बुझाउन प्रक्रिया अघि बढाउँदा बढाउँदै पाण्डे त्यहीँबाट फरार भएको उनको जिकिर छ ।
शाहले भने, ‘पत्र बनाउने क्रममा उहाँ गायब हुनुभयो । खोज्न गएको, भेट्न सकिएन । कहाँ लुके नै थाहा भएन ।’
एयरपोर्टभित्र छिरेको मान्छे प्रहरीको आँखा छलेर कसरी बाहिर निस्कियो भन्ने विषयमा आफैं चकित भएको उनको भनाइ छ ।
शाह भन्छन्, ‘मेरो दोष छैन । पत्र बनाउनेक्रममा मान्छे गायब भयो । प्रहरीको तीन वटा घेराबाट अपराधी कसरी बाहिर निस्कियो ?’
यसबारे प्रहरीमाथि अनुसन्धान हुनुपर्ने उनको सुझाव छ ।
प्रतिक्रिया