नौ रोपनी नौ आनामा बनेको पशुपतिस्थित गौशाला धर्मशाला मासिक चार हजार दुई सय ५० रुपैयाँमा भाडामा लगाइएको पाइएको छ ।

पशुपति क्षेत्र विकास कोषले १८ वर्षदेखि उक्त धर्मशाला कौडीको भाउमा मारवाडी सेवा समितिलाई भाडामा दिएको हो ।

कोष स्वामित्वको जग्गामा बनेका संरचनाबाट मारवाडी सेवा समितिले महिनामै करिब ५० लाख आम्दानी गरिरहेको नयाँ पत्रिका दैनिकले खबर लेखेको छ ।

पशुपति क्षेत्र विकास कोषले अमलकोट कचहरी गुठीअन्तर्गत रहेको जग्गा र धर्मशाला १२ जेठ ०६० मा मारवाडी सेवा समितिलाई सञ्चालन गर्न दिने सम्झौता गरेको थियो । तथापि, यो सम्झौता पशुपति क्षेत्र विकास कोष ऐनविपरीत रहेको बताइएको छ ।