काठमाडौं । नेपाली कांग्रेसका नेता प्रकाशमान सिंहले संविधानले तोकेको मितिमै स्थानीय तहको निर्वाचन हुनुपर्ने बताएका छन् ।

मंगलबार काठमाडौंमा पत्रकारहरूसँग कुरा गर्दै नेता सिंहले संविधान र स्थानीय तह निर्वाचन ऐन २०७३ अनुसार नै निर्वाचन गरिनुपर्ने बताएका हुन् ।

उनले भने, ‘संविधान र स्थानीय तह निर्वाचन ऐन अनुसार समयमै स्थानीय तहको निर्वाचन हुनुपर्छ ।’ संविधानले पाँच वर्षमा स्थानीय तहको निर्वाचन हुनुपर्ने उल्लेख भएकाले सोही अनुसार हुने उनको भनाइ छ ।

साथै हालको सत्तारुढ गठबन्धन संविधान पालना गर्नकै लागि बनेको उनको दावी छ । सरकारले जेठ ५ अघि नै स्थानीय तहको निर्वाचन गर्ने तयारी गरेको छ ।

चुनावमा मिति सार्ने कोशिस भए पनि जनस्तरबाट व्यापक दबाव आएपछि सरकारले जेठमै चुनाव घोषणा गर्ने तयारी गरेको हो ।