काठमाडौं । नेपाली कांग्रेसको केन्द्रीय कार्यसम्पादन समितिको बैठकले बाँकी रहेका १६ जिल्लाको अधिवेशन मिति टुंगो लगाएको छ । आज बसेको बैठकले फागुन १३ गते गर्ने निर्णय गरेको हो ।

विभिन्न कारणले अधिवेशन हुन नसकेका १६ जिल्लामा फागुन १३ मा अधिवेशन गर्ने निर्णय भएको कांग्रेस प्रवक्ता डा. प्रकाशशरण महतले बैटकपछि पत्रकारहरूलाई जानकारी दिए ।

कांग्रेसको बैठक म्याद सकिएका भ्रातृ एवं शुभेच्छुक संस्थाबारे भने अनिर्णित भएको छ ।

कांग्रेसको कार्यसम्पादन समितिको बैठक बिहीबार र आज गरी दुई दिन बसेको थियो ।

बैठक आइतबार पुनः बस्ने र त्यसबारे निर्णय लिने महतले जानकारी दिए ।

नेविसंघ, तरुण दल, महिला संघ, दलित संघ, मुस्लिम संघ, किसान संघ लगायत कांग्रेसका दर्जनभन्दा बढी भ्रातृ एवं शुभेच्छुक संस्थाको लामो समयदेखि अधिवेशन हुन सकेको छैन ।