काठमाडौं । अमेरिकी परियोजना एमसिसी संसद्बाट अनुमोदन गर्ने सम्बन्धमा सत्ता गठबन्धन दलभित्रै खटपट भएपछि बिहीबार गठबन्धन दलहरूको बैठक बस्ने भएको छ ।

प्रधानमन्त्री निवास बालुवाटारमा प्रधानमन्त्री शेरबहादुर देउवा र नेकपा माओमादी केन्द्र)का अध्यक्ष पुष्पकमल दाहाल प्रचण्डबीच भएको छलफलबाट बिहीबार सत्ता गठबन्धनको बैठक बोलाएको प्रचण्डका स्वकीय सचिव रमेश मल्लले जानकारी दिएका छन् ।

मल्लका अनुसार बिहीबार ३ बजे दिउँसो गठबन्धनका शीर्ष नेताहरूको बैठक वालुवाटारमा बस्ने सहमति भएको छ ।

मंगलबार बसेको कांग्रेस संसदीय दलको बैठकले एमसिसीको पक्षमा मतदान गर्ने निर्णय गरेको थियो । प्रधानमन्त्री देउवाले सभामुख अग्निप्रसाद सापकोटालाई फोन गरी बुधबारको संसद बैठकमा एमसिसी टेबुल गर्ने सम्बन्धमा परामर्श गरेका थिए ।

आजको संसद् बैठकले उक्त बिल अगाडि बढ्ने विश्वास लिएका थिए । तर नेपाली कांग्रेसबाहेक गठबन्धनका अन्य दल संशोधन नगरी एमसिसी संसद्बाट पारित हुन नसक्ने अडान लिँदै आएका छन् ।

एमसिसी पारित गर्ने सम्बन्धमा गठबन्धन दलहरूबीच विवाद भएपछि सरकारले आज संसद्का पेश गर्न लागिएको बिल स्थगित भएको छ ।