NepalWatch

News Portal For Eeverything In Nepal from Nepal

२०८१ वैशाख २ गते

एमसिसीबारेको निर्णायक छलफलमा नेकपा एस, ज्वाला भन्छन्– बलजफ्ती गरे सरकार छाड्छौं

काठमाडौं । अमेरिकी सहयोग परियोजना मिलेनियम च्यालेन्ज परियोजना (एमसिसी) सम्बन्धमा पार्टीको ठोस धारणा सार्वजनिक गर्न सत्तारुढ दल एकीकृत समाजवादीको स्थायी कमिटी बैठक सुरु भएको छ ।

अहिले बिहान ११ बजे होटल अर्यालमा बानेश्वरमा एकीकृत समाजवादीको बैठक सुरु भएको सो पार्टीका उप–महासचिव प्रकाश ज्वालाले नेपालवाचलाई जानकारी दिए ।

आजको बैठक एमसिसीमा केन्द्रित रहेर निष्कर्ष निकाल्ने उनले बताए ।

एमसिसीलाई लिएर दुई महाशक्ति राष्ट्र चीन र अमेरिकाबीच टकरावको स्थिति उत्पन्न हुनु उनीहरूको सवाल भएको प्रतिक्रिया पनि उनले दिए ।
‘नेपालमा एमसिसी पास गर्ने वा फेल गर्ने नेपालको आन्तरिक विषय हो,’ उनले भने, ‘यस विषयलाई लिएर दुई शक्ति राष्ट्र चीन र अमेरिकाबीच तनाव उत्पन्न हुनु हाम्रो सवाल होइन । उनीहरूको सवाल हो ।’

एमसिसी जबरजस्ती अघि बढाए सरकारबाट बाहिरिने चेतावनी उनले दिए ।

उनले एमसिसीमा भएको असमान प्रावधान परिमार्जन नभई संसदबाट एमसिसी अनुमोदन हुन नसक्ने बताए । ज्वालाका अनुसार स्थायी कमिटी बैठकले एमसिसीको विषयमा स्पष्ट निर्णय सार्वजनिक गर्नेछ । एमसिसी संशोधन गर्ने वा नगर्नेबारे सत्ता गठबन्धनमा मतभेद हुँदा एमसिसीलाई सरकारले संसदमा टेबुल गर्न सकेको छैन । एमसिसीबारे ठोस निर्णय गर्न गठबन्धनको बैठक आइतबार बस्दैछ ।