काठमाडौं । अमेरिकी सहयोग परियोजना एमसिसी सम्झौताको सवालमा सत्तारूढ दल माओवादी केन्द्रले सोमाबार पत्रकार सम्मेलन गर्दैछ ।

सम्झौता आइतबार संसदबाट अनुमोदन भएपछि पार्टीप्रति देखिएको भ्रमलाई प्रष्ट पार्न पत्रकार सम्मेलन गर्न लागिएको प्रचण्डका निजी सचिवालयले जनाएको छ ।

निजी सचिवालयका अनुसार पत्रकार सम्मेलन दिउँसो तीन बजे प्रचण्ड निवास खुमलटारमा हुनेछ ।

यथास्थितिमा एमसिसी पास नगर्ने अडान लिएको माओवादी केन्द्रले आइतबार व्याख्यात्मक टिप्पणीसहित पास गर्न सहमत भएको थियो ।

प्रचण्डको उक्त कदमप्रति पार्टी नेता तथा कार्यकर्तामा चरम निराशा देखिएको छ । उनको सचिवालयले बाध्यात्मक परिस्थितिमा ‘ड्यामेज कन्ट्रोल’को निर्णय भएको भन्दै प्रचण्डको कदमको बचाउ गरेको छ ।