काठमाडौं । छिमेकी देश युक्रेनमाथि आक्रमण गरेपछि फुटबलमा रुसले मंहंगो मूल्य चुकाउनु परेको छ । सोही आक्रमणलाई निउँ बनाएर फुटबलको सर्वोच्च निकाय विश्व फुटबल महासंघ (फिफा)ले रुसलाई कतार विश्वकप छनोटबाट निस्काशित गरेको छ ।

फिफाले मंगलबार रुसलाई छनोटबाट निस्काशित गरिएको पुष्टि गरेको हो ।

युरोपियन छनोटअन्तर्गत रुस प्ले अफमा पुगेको थियो । सेमिफाइनलअन्तर्गत रुसले पोल्याण्डसँग मार्च २९ मा खेल्ने तालिका रहेको थियो ।

तर, फिफाले पोल्याण्डलाई बाई दिँदै नखेलिकनै प्ले अफको फाइनलमा छनोट गराएको छ ।

अब पोल्याण्डले स्विडेन र चेक रिपब्लिकबीचको विजेतासँग फाइनलमा खेल्नेछ । त्यसको विजेता विश्वकपमा छनोट हुनेछ ।

फिफाले यसअघि नै रुसलाई अनिश्चितकालका लागि प्रतिबन्ध गरिसकेको थियो ।