काठमाडौं । एकदिवसीय विश्वकप छनोट अन्तर्गतको त्रिकोणात्मक श्रृखलामा नेपालले पपुवा न्युगिनीविरुद्ध २०५ रनको लक्ष्य पाएको छ । निर्धारित ५० ओभरको खेलमा ८ विकेट गुमाउँदै पिएनजीले २०४ रन बनाएको हो ।

पिएनजीका लागि चाल्र्स एमिनीले सर्वाधिक ५९ रन बनाए । चाड सोपेरले ३५ रन बनाए । टोरी उराले २७, लेगा सिआकाले २५, नर्मन भानुवाले २३ र असाद भालाले १९ रन बनाए ।

नेपालका लागि बलिङतर्फ नेपालका सोमपाल कामीले तीन, आरिफ शेख, सन्दीप लामिछाने र ज्ञानेन्द्र मल्लले एक एक विकेट लिए । मल्लले पहिलोपटक एक दिवसीय खेलमा विकेट लिएका हुन् ।

१३ खेलिसक्दा पिएनजीले एक खेल पनि जितेको छैन । नेपालले ८ खेलमध्ये चारवटामा जित र चारवटामा हार बेहोरेको छ ।

समूहका सात टिममध्ये शीर्ष तीन एक दिवसीय विश्वकप छनोटको क्वालिफायरमा अघि बढ्नेछन् । ३६ अंकसहित ओमान पहिलो स्थानमा छन् ।