काठमाडौं । आइसिसी विश्वकप लिग–२ त्रिकोणात्मक एकदिवसीय सिरिज अन्तर्गत दोस्रो खेलमा नेपाल र युएई आज भिड्दैछन् । श्रृंखला अन्तर्गत पहिलो खेलमा यी दुवै टिमले पपुवा न्युगिनीलाई पराजित गरेका थिए ।

युएईले ७ विकेट र नेपालले २ विकेटले पराजित गरेका थिए । युएईले सहज जित हात पारे पनि नेपालले मुस्किलले पिएनजीलाई पराजित गरेको थियो ।

तीन देशमध्ये नेपाल र युएई बलिया टोली हुन् । तर पछिल्लो समय नेपालभन्दा पनि युएई नै बलियो देखिएको छ ।

केही समय अघि मात्रै नेपाललाई सहजै हराउँदै युएईले टी–२० विश्वकप खेल्ने पक्का गरेको थियो । केही समयमै हुन लागेको खेलमा नेपाललाई त्यही हारको बदला लिने अवसर आज छ । खेल नेपाली समय अनुसार सवा ११ बजे सुरू हुनेछ ।

एक दिवसीय विश्वकप छनोट अन्तर्गत सात देशले खेलिरहेकोमा ओमान २८ खेलबाट ३६ अंकसहित पहिलो स्थानमा छ । युएई १५ खेलबाट १८ अंकसहित दोस्रो, स्कटल्याण्ड १२ खेलबाट १६ अंसहित तेस्रो, नामिबिया १४ खेलबाट १४ अंकसहित चौथो, अमेरिका १६ खेलबाट १४ अंकसहित पाँचौ र नेपाल ९ खेलबाट १० अंकसहित छैटौं स्थानमा छ । १४ खेलबाट पपुवा न्युगिनीले कुनै अंक बटुल्न सकेको छैन ।

सातमध्ये शीर्ष तीन टिम एक दिवसीय विश्वकप छनोटतर्फ अगाडि बढ्नेछन् ।