काठमाडौं । नेकपा (माओवादी केन्द्र)का अध्यक्ष पुष्पकमल दाहाल प्रचण्डले आफ्नो पार्टीले नेतृत्व गरेको स्थानीय तहमा राम्रो काम भएको दाबी गरेका छन् ।

शहीद रामवृक्ष यादवको शालिक अनावरणका लागि आइतबार जनकपुरधाम पुगेका प्रचण्डले माओवादीका जनप्रतिनिधिले नेतृत्व गरेको पालिका उत्कृष्ट भएको दाबी गरेका हुन् ।

‘यो मैले गरेको दाबी होइन । सरकारको संवैधानिक समितिले दिएको रिर्पोटमा माओवादीले नेतृत्व गरेको स्थानीय सरकारले उत्कृष्ट काम गरेको रिर्पोट दिएको छ’, उनले भने, ‘माओवादीले जहाँ नेतृत्व ग¥यो त्यहाँ सर्वश्रेष्ठ भयो । अन्यको भएन भन्ने रिर्पोट आएको छ । त्यसैले आगामी दिनमा पनि राम्रो र उत्कृष्ट काम गर्ने जोश र जाँगरका साथ आफूले गरेका राम्रा कामका एजेण्डा बोकेर जनताकोमा जानोस् ।’

देशलाई संकट पर्दा बचाउने माओवादी भए पनि सरकारको नेतृत्वमा गैरमाओवादी हुनु बिडम्बना भएको उनले टिप्पणी गरे । माओवादीले मात्र राम्रो काम गर्न सक्छ भन्ने विश्वास जनतालाई भएकोले आफ्नो पक्षमा जन लहर बढ्दै गएको जिकिर गरे ।