काठमाडौं (एजेन्सी) । अमेरिकी राष्ट्रपति जो बाइडनले रुसबाट ऊर्जा आयात नबढाउन आग्रह गरेका छन् । सोमबार मोदीसँगको एक घण्टा लामो भिडियो संवादका क्रममा बाइडनले यस्तो आग्रह गरेका हुन् ।

रुसी ऊर्जा आयात बढाउनु दिल्लीको स्वार्थअनुकूल नरहेको बाइडनको भनाइ छ ।

बिबिसीका अनुसार, बाइडनले ऊर्जा आयातमा विविधीकरणका लागि भारतलाई सहयोग गर्ने वचन दिएका छन् ।

भारत रुससँग परम्परागत सम्बन्ध रहेको मुलुक एक हो । उसले सैन्य सामग्रीको ठूलो हिस्सा रुसबाट नै आपूर्ति गर्दै आइरहेको छ । त्यसैले युक्रेन युद्ध पश्चात भारतले रुसलाई चिढाउने खालका कुनै पनि अभिव्यक्ति दिएको छैन । रुसविरुद्ध लगाइएका विभिन्न प्रतिबन्धमा पनि भारत सामेल नभई तटस्थ छ ।

छलफलका क्रममा कोभिड सहयोग, विश्व अर्थतन्त्र र हिन्द प्रशान्त सुरक्षा मामिलाबारे पनि छलफल भएको बताइएको छ ।