काठमाडौं । श्रीलंकामा मूल्यवृद्धिको विरोधमा भएको प्रदर्शनमा एक जनाको मृत्यु भएको छ भने ११ घाइते भएका छन् । मंगलबार रामबुकानामा भएको प्रदर्शनमा प्रहरीले गोली चलाएपछि मानवीय क्षति भएको हो ।

प्रदर्शनकारीले रामबुकानाको प्रहरी चौकी घेरेर ढुंगामुढा गरेपछि प्रहरीले अश्रुग्यास प्रहार गरेको थियो । तर अवस्था नियन्त्रणमा नआएपछि गोली चलाएको त्यहाँको प्रहरीले स्थानीय सञ्चारमाध्यमलाई जनाएको छ ।

प्रदर्शन हिंसात्मक बनेपछि अहिले रामबुकाना क्षेत्रमा अनिश्चितकालका लागि कर्फ्यू आदेश जारी गरिएको छ ।

इतिहासमा नै पहिलो पटक चर्को आर्थिक संकटमा फसेको श्रीलंकामा केही सातायता सरकारविरोधी प्रदर्शन भइरहेका छन् । इन्धन अभाव, मूल्यवृद्धिको विरोधमा सडकमा उत्रिएका प्रदर्शनकारीले राष्ट्रपतिको राजीनामा मागेका छन् । तर राष्ट्रपति पद छाड्ने मुडमा छैनन् ।