काठमाडौं । पूर्वराष्ट्रपति डा. रामवरण यादवको घरभाडा नवीकरणका लागि गृह मन्त्रालयमा पत्राचार भएको छ । सम्झौताको करार अवधि सकिएसँगै उनी बहाल रहँदै आएको घरको सम्झौता मिति नवीकरण गरिदिनुपर्यो भन्दै घरधनी रविभक्त विष्टले मन्त्रालयमा पत्राचार गरेका हुन् ।

उक्त सम्झौता गत ३२ असारमै सकिइसकेको थियो । घरधनी विष्टले घरको करारअवधि सकिएको र साउन १ गतेदेखि लागू हुनेगरी सम्झौता नवीकरणसँगै करसहित मासिक बहाल एक लाख ९२ हजार दुई सय रूपैयाँ भुक्तानी गर्न गुहारेका छन् ।

गृह मन्त्रालयका प्रवक्ता फणिन्द्रमणि पोखरेलका अनुसार नयाँ आर्थिक वर्ष सुरु भएकाले सकिएको पुरानो सम्झौता नवीकरण गर्नुपर्ने भएको हो । एकपटक पुनः नवीकरण भएपछि मन्त्रालयबाट मासिक रूपमा घरधनीको बैंक खातामा रकम पठाइने गरेको उनले जानकारी दिए ।

पूर्वराष्ट्रपति यादव ललितपुर महानगरपालिका वडा नं ३ बागडोलस्थित विष्टको घरमा २०७२ कात्तिक १२ गतेदेखि बस्दै आएका छन् ।

यसअघि सरकारले घरभाडा भुक्तानी नदिएपछि घरमालिक विष्टले पूर्वराष्ट्रपति यादवलाई उक्त घर खाली गर्नका लागि १५ दिने सूचना जारी गरेका थिए । सरकारले पैसा नतिरेको भन्दै विष्टले त्यतिबेला पत्रिकामार्फत नैै सार्वजनिक रूपमा सूचना नै जारी गरेका थिए ।

पूर्वराष्ट्रपतिले पाउने सुविधाबारे २०७३ माघ २० को मन्त्रिपरिषद् बैठकले निर्णय गरेको थियो । सो निर्णयअनुसार पूर्वराष्ट्रपतिको आफ्नो घर भएमा मासिक एक लाख रूपैयाँ उपलब्ध गराउने र नभएको खण्डमा मासिक दुई लाख रूपैयाँ सरकारले व्यहोर्ने निर्णय भएको थियो ।