काठमाडौं । फिफाले भारतीय फुटबल महासंघलाई निलम्बन गरेको छ । राजनीतिक हस्तक्षेप भएको भन्दै विश्व फुटबलको सर्वोच्च संस्था फिफाले भारतीय फुटबल महासंघलाई निलम्बन गरेको हो ।

फुटबल संघ निलम्बनमा परेपछि भारतबाट यु–१७ महिला विश्वकप फुटबल पनि अर्को देशमा सर्ने पक्का भएको छ ।

यतिमात्रै होइन निलम्बनमा परेपछि भारतले महिला साफ च्याम्पियनसीप पनि खेल्न नपाउने भएको छ । यो प्रतियोगिताका अहिलेसम्मका सबै संस्करण भारतले जितेको थियो ।

भारतले पाँचवटा उपाधि जित्दा चारपटक नेपाललाई नै हराएको थियो । तर अब भारत प्रतिबन्धमा परेपछि नेपाललाई उपाधि जित्ने अवसर आएको छ । यो प्रतियोगिता २९ भदौदेखि असोज ३ सम्म काठमडौंमा हुँदैछ ।