काठमाडौं । सिरिज जित्न कमजोर लक्ष्य पछ्याउँदा पनि केन्यासँग पराजित भएको नेपालले आज सिरिजको अन्तिम र निर्णायक खेल खेल्दैछ ।

सोमबार नेपाल १०२ रन पछ्याउँदा पनि ७ रनले पराजित हुन पुगेको थियो । सन्दीप लामिछानेको टी २० मा ४ ओभर ९ रन ५ विकेटको महत्वपूर्ण प्रदर्शन पनि खेर गएको खेलमा नेपालले लज्जास्पद पराजय बेहोरेको हो ।

अघिल्लाे दिनमात्रै नेपालले १५७ रन पछ्याउँदा पनि सहज जित हात पारेकाे थियाे । तर भाेलिपल्टै १०२ रनकाे लक्ष्यमा पनि नेपाल चुक्याे ।

रोहित पौडेलबाहेकका कुनै पनि ब्याटरले दोहोरो अंकमा रन बनाउन नसक्दा नेपालले शर्मनाक पराजय बेहोरेको हो । जसले आइसकेको सिरिज पनि गुम्ने जोखिम बढाएको छ ।

कम लक्ष्यमा पनि नेपाललाई रोक्न सकेको केन्याको भने मनोबल बढेको छ । तर सधैंझै नेपालको ब्याटिङको चिन्ता फेरि पनि बढेको छ ।

खेल नेपाली समय अनुसार दिउसो पौने चार बजे सुरु हुनेछ ।