काठमाडौं । गएरातिदेखि परेको अविरल वर्षापछि आएको बाढी तथा पहिरोमा परी दार्चुलामा दुई जनाको मृत्यु भएको छ । एकै परिवारका चारसहित ६ जना बेपत्ता छन् भने दर्जनौं घर बाडीले बगाएको छ ।

जिल्ला प्रहरी कार्यालय, दार्चुलाका अनुसार, महाकाली नदी र लास्कु खोलामा आएको बाढीले अहिलेसम्म दर्जनौं घर बगाइसकेको छ । कैयन् जोखिममा छ । त्यसैगरी, डुङुरीस्थित लास्कु खोलामा आएको बाढीले एकै घरका चार जना बेपत्ता बनेका छन् ।

उता, नौगाडमा आएको बाढी र पहिरोले आधा दर्जन बढी घरहरूमा क्षति पुगेको छ भने दुई जनाको मृत्यु भएको छ । नौगाड गाउँपालिका १ कि जानकी ठगुन्ना र २ का मोहनराम पार्की बेपत्ता भएका छन् ।

खलंगास्थित दशरथनगर आधारभूत विद्यालय, दुहुँ र महाकाली जोड्ने लास्कु झोलुंगे र मोटरवेल पुल पनि बाढीले बगाएको जिल्ला प्रहरी कार्यालय, दार्चुलाले जनाएका छन् । तिंकरमा सडकमा राखिएका चारवटा जिप पनि बाढीले बगाएर लगेको छ ।

बाढी र पहिरोपछि दार्चुला तिंकर सडक अवरुद्ध छ ।

बाढी र पहिरोले धनजनको क्षति पुगेपछि अहिले यी क्षेत्रमा नेपाली सेना, नेपाल प्रहरी, सशस्त्र प्रहरी परिचालन गरिएको छ ।