काठमाडौं । विवेकशील साझा पार्टीका नेता मिलन पाण्डे काठमाडौं क्षेत्र नंबर ९ बाट चुनाव लड्ने भएका छन् । यसअघिको निर्वाचनमा पनि उनी सोही क्षेत्रमा आफ्नो उम्मेदवारी दिएका थिए ।

आफ्नो आधिकारिक फेसबुकमार्फत स्टाटस जारी गर्दै उनले यसबारे जानकारी गराएका हुन् । संसदमा उनले शिक्षा, स्वास्थ्य र युवा रोजगारीका विषयलाई उठाउने बताएका छन् ।

अहिलेकै संविधानलाई सुधार गर्दै नागरिकको अवस्था सुधारमा ध्यान दिने विषयलाई मूल मुद्दाको रूपमा उनले अघि सारेका छन् । यसवाहेक पार्टीका स्पष्ट एनेण्डा छिट्टै सार्वजनिक गर्ने उनको आश्वासन छ ।

विभिन्न शैक्षिक संस्थामा रहेर दश वर्ष काम गरेको हुनाले आफूलाई शिक्षा सुधारमा विशेष रूचि भएको पाण्डेको भनाई छ । यही अनुभवको आधारमा हरेक नागरिकको निःशुल्क र गुणस्तरीय शिक्षामा आफ्नो सधैं वकालत रहने उनको दाबी छ ।

०७४ को निर्वाचनमा पहिलोपटक काठमाडौं क्षेत्र नंबर ९ बाटै प्रतिनिधिसभाको उम्मेदवार बनेका उनले करिब पाँच हजार मत प्राप्त गरेका थिए ।

वि सं २०७० मा विवेकशील नेपालीको संस्थापक सदस्यको रूपमा पाण्डेको राजनीतिक यात्रा सुरू भएको हो । त्यसको ६ वर्ष पछि पार्टी अध्यक्ष निर्वाचित भएका उनी ०७७ मा विवेकशील र साझा पार्टी एक भएपछि पार्टी संयोजक भएका थिए ।

काठमाडौं क्षेत्र नंबर ९ मा गठबन्धनबाट कल्पना धमलाले उम्मेदवारी दिएकी छन् भने एमालेबाट कृष्ण गोपाल श्रेष्ठ उम्मेदवारी दिएका छन् ।