काठमाडौं । कालीकोटमा बम विस्फोट हुँदा २ बालबालिकाको मृत्यु भएको छ भने तीन जना घाइते भएका छन् ।

जिल्लाको तिलागुफा नगरपालिका–१०, रानावाडाको कोदोबारीमा बम विस्फोट भएको हो ।

घटनामा स्थानीय ४ वर्षीया बालिका झरना थापा र सरस्वती रानाको मृत्यु भएको जिल्ला प्रहरी कार्यालय, कालीकोटका प्रमुख डिएसपी जयश्वर रिमालले जानकारी दिए ।

सोही विस्फोटमा परी तिलागुफा नगरपालिका–१०, रानावाडका ७ वर्षीय कमल थापा, ५ वर्षीय मुस्कान थापा, ३ वर्षीया दर्शना राना गम्भीर घाइते भएका छन् । उनीहरूलाई हेलिकप्टरबाट उद्धार गरी उपचारका लागि सुर्खेत पठाइएको छ ।

बालबालिका खेलिरहेका बेला शनिबार एक्कासि बम विस्फोट भएको थियो । बम नयाँ हो वा पुरानो, खुल्न बाँकी छ ।