काठमाडौं । कर्णाली प्रदेशको सल्यानमा एकीकृत समाजवादीका उम्मेदवार प्रकाश ज्वालाले मतान्तर फराकिलो बनाउँदै लगेका छन् ।

मंगलबार बिहान ८ बजेसम्मको मतपरिणाम अनुसार ज्वाला ८ हजार ९०७ मतसहित अग्रता लिएका छन् । उनका निकटतम प्रतिद्वन्द्वी स्वतन्त्र उम्मेदवार राजेन्द्रबहादुर शाहले ४ हजार १३६ मत पाएका छन् । एमालेका राजेन्द्रवीर राय २ हजार ४१८ मतसहित तेस्रो स्थानमा रहेका छन् ।

ज्वालाको मतान्तर ४ हजार ७७० रहेको छ । ज्वाला २०७४ को निर्वाचन प्रदेशसभा १ बाट निर्वाचित भएका थिए । संघमा माओवादीका टेकबहादुर बस्नेत विजयी भएका थिए । कर्णाली प्रदेशको माओवादी नेतृत्वको सरकार जोगाउन ज्वालासहित ४ जना प्रदेशसभा सदस्यले एमालेसँग विद्रोह गरी मुख्यमन्त्री महेन्द्रबहादुर शाहीको पक्षमा मतदान गरेका थिए ।

यही विद्रोहका कारण उनको पद गुमेको थियो । उपमहासचिवसमेत रहेका ज्याला माधव नेपालका विश्वासिला नेता हुन् । एमाले विभाजन हुँदा उनले एकीकृत समाजवादी रोजेका थिए । गठबन्धनको भागबण्डामा सो क्षेत्र माओवादीले ज्वालालाई छाडेको थियो ।

सल्यानमा एमाले बलिाये स्थितिमा रहेको भएपनि नवप्रवेशीलाई प्राथमिकतामा राख्दा योपटक कमजोर मतसहित तेस्रो स्थानमा रहेको छ । यहाँ एमालेका उम्मेदवारभन्दा स्वतन्त्र उम्मेदवार निकै बलियो देखिएको छ । राप्रपाको उपाध्यक्षसमेत रहेका राय केहीसमय अघिमात्र राप्रपाबाट एमाले प्रवेश गरेका थिए ।