काठमाडौं । प्रत्यक्षतर्फको मतगणनासँगै समानुपातिकको पनि अघि बढाइएको छ । मंसिर २२ गतेसम्म सम्पूर्ण निर्वाचन परिणाम बुझाउने तयारी गरेको निर्वाचन आयोगले समानुपातिकतर्फको मतगणनालाई पनि तदारुकताका साथ अघि बढाएको हो ।

प्रतिनिधिसभाको प्रत्यक्षतर्फको मतगणनामा कांग्रेस र एमालेको कडा प्रतिस्पर्धा देखिएको छ । कांग्रेसले ४३ सिटमा अग्रता कायम गर्दै ४ मा जित हासिल गर्दा एमाले उम्मेदवार ४३ स्थानमा अगाडि र १ स्थानमा विजयी बनेका छन् ।

समानुपातिकमा भने एमालेले कांग्रेसलाई पछि पारेको छ । प्राप्त पछिल्लो मत परिणामअनुसार एमालेले ८४ हजार ८१५ मत हासिल गरिसकेको छ । कांग्रेस समानुपातिकतर्फ एमालेभन्दा १३ हजार मतले पछाडि परेको छ । उसले अहिलेसम्म ७१ हजार ५२५ मत जोड्न सकेको छ ।

माओवादीलाई घण्टीले उछिन्यो 

तेस्रो राष्ट्रिय शक्तिमा माओवादी र नवगठित राष्ट्रिय स्वतन्त्र पार्टी (रास्वपा) बीच प्रतिस्पर्धा हुने देखिएको छ । प्रत्यक्षतर्फ माओवादीका १३ र राष्ट्रिय स्वतन्त्र पार्टीका १२ उम्मेदवारले लिड गरिरहेका छन् ।

समानुपातिकतर्फ भने रास्वपाले माओवादीलाई पछि पारेको छ । प्राप्त पछिल्लो मत परिणामअनुसार, माओवादी केन्द्रले ३२ हजार ७२५ मत ल्याउँदा रवि लामिछानेको दल रास्वपाले ३६ हजार १०९ हासिल गरेको छ ।

समानुपातिकमा राप्रपाले पनि सम्मानजनक मत ल्याइरहेको छ । उसले अहिलेसम्म हासिल गरेको मत २० हजार ५४ छ ।
प्रत्यक्षमा जस्तै एकीकृत समाजवादी समानुपातिकमा पनि कमजोर देखिएको छ ।

प्रतिनिधिसभाको प्रत्यक्षतर्फ ६ सिटमा लिड गरेको यो दलले समानुपातिकमा ३ हजार ७४५ मत पाएको छ ।