काठमाडौं । गोरखामा बाटो नभएको ठाउँमा पुल बनाउने तीनजनाविरूद्ध भ्रष्टाचार मुद्दा दायर भएको छ ।

अख्तियार दुरूपयोग अनुसन्धान आयोगले यसमा संलग्न गण्डकी प्रदेशको भौतिक पूर्वाधार, शहरी विकास तथा यातायात मन्त्रालयका तत्कालीन सचिव इश्वर चन्द्र मरहट्टा, प्रदेश सडक निर्देशनालयका तत्कालीन निमित्त निर्देशक राम कुमार श्रेष्ठ र पूर्वाधार विकास कार्यालय, गोरखाका सिनियर डिभिजनल इन्जिनियर ओमराज ढुंगानाविरूद्ध मुदा दायर गरेको हो ।

उनीहरूलाई पाँच करोड ४५ लाख ५२ हजार ६७१ रूपैयाँ बिगो माग दाबी गर्दै आज विशेष अदालतमा आरोपपत्र दायर भएको हो ।

गोरखा नगरपालिका वडा नं ३ जरेवरस्थित दरौदी नदीमाथि बाटो नै नभएको अवस्थामा पुल बनेपछि आयोगमा उजुरी परेको थियो ।

यसमाथि अनुसन्धान हुँदा तत्कालीन प्रदेश सचिव मरहट्टाले परामर्शदातासँग सम्झौतामा हुँदै नभएको कार्यक्रम कानुन विपरित गएर थप गरेको, पुलको स्थान र नाम परिवर्तन गरेको पाइएको थियो ।

त्यस्तै तत्कालीन निमित्त निर्देशक श्रेष्ठ र सि.डि ढुंगानाले पुलको निर्माण गराउन काल्पनिक सडकको नाम पेश गरी पुलको डिजाइन बनाएको पाइएको छ ।