एजेन्सी । हाम्राे शरीरमा विभिन्न प्रकारका भिटामिनहरू आवश्यक पर्छ । ती मध्य भिटामिन ‘डी’ पनि एक हाे । भिटामिन ‘डी’ हड्डी र दाँत बलियो राख्न, मांसपेशिहरूको उचित विकास र राम्रो मानसिक स्वास्थ्यको लागी आवश्यक छ ।

शरीरमा यसको कमी हुँदा हड्डी तथा मांशपेशीका साथै शरीर नै कमजोर हुन्छ । जसले सानो चोट लाग्दा पनि हड्डी भाचिन थाल्छ भने कपाल पनि छिटै फुल्न लाग्छ । यसको कमीले बुढेसकालमा बिर्सिने बानी अर्थात् डिमेन्सियाको जोखिम उच्च हुन्छ । यसैगरी भिटामिन ‘डी’ को पूर्ति नहुँदा आलस्यता, अल्छिपना, निराशयता थकान महसुस हुन्छ । भिटामिन ‘डी’ ले छालाको एलर्जी हटाउन पनि मद्दत गर्छ ।

यो सँगै यसले रोग प्रतिरोधात्मक क्षमता पनि पनि कमजोर बनाउँछ । जसका कारण मानिसहरु बिरामी पर्न थाल्छन् । भिटामिन ‘डी’ को सबैभन्दा राम्रो र प्राकृतिक स्रोत घाम हो । हरेक दिन कम्तिमा आधा घण्टा घाम ताप्नु महत्त्वपूर्ण हुन्छ ।

बिहान १० बजेदेखि बेलुका ४ बजेसम्मको सूर्यको किरण भिटामिन ‘डी’ को लागि उपयुक्त हुने विज्ञहरू बताउँछन् । तर गर्मी मौसममा भने बिहान सबेरैको घामको पहिलो किरणमा बस्दा भिटामिन ‘डी’ को कमी पूरा हुन्छ । यसैगरी घामबाहेक दुधबाट बनेका उत्पादन, अण्डा, माछा, च्याउ, ओट्स, सुन्तला र गहुँ–जौ जस्ता अन्नमा पनि भिटामिन ‘डी’ पाइन्छ ।