काठमाडौं । अख्तियार दुरूपयोग अनुसन्धान आयोगले आज सर्लाहीका जनस्वास्थ्य निरीक्षक कौशलेन्द्र मिश्रविरूद्ध भ्रष्टाचार मुद्दा दायर गरेको छ ।

मिश्रले सार्वजनिक पदमा बहाल रहँदा गैरकानुनी सम्पत्ति आर्जन गरेको आरोपमा विशेष अदालत काठमाडौंमा मुद्दा दायर भएको छ ।

उनीविरूद्ध एक करोड १३ लाख ४५ हजार ८०५ रूपैयाँ बराबरको बिगो माग गरिएको छ ।

आयोगले उनले सेवा प्रवेश गरेको मिति २०५७/०३/०८ देखि मिति २०७८/०७/२६ सम्म उनले आर्जन गरेको सम्पत्ति विवरण अध्ययन गरेको थियो । सो अवधीमा मिश्रको पारिश्रामिक बचत, अन्य भत्ता, विभिन्न बैंक वित्तिय संस्था तथा व्यक्तिबाट लिएको कर्जालगायतबारे अध्ययन गर्दा आय र व्ययमा सो रकमको स्रोत खुल्न सकेन ।

मिश्रले पदमा रहँदा पदीय हैसियतको दुरुपयोग गरी गैरकानुनी सम्पत्ति आर्जन गर्नुसँगै अमिल्दो र अस्वभाविक उच्च जीवनस्तर यापन गरेको दाबी गरेको छ ।

मिश्रले गैरकानुनी रूपमा आर्जन गरेको सम्पत्ति आफ्ना पत्नीहरू सरोज कुमारी र तुलसी कुमारी मिश्र शर्माको नाममा राखेको पाइएको छ ।

उक्त सम्पत्ति जफतका लागि आयोगले श्रीमतीद्वयलाई पनि प्रतिवादी बनाएर मुद्दा दायर गरेको छ ।