काठमाडौं । भवन निर्माण सम्पन्न् भएको सिफारिसका नाममा ५० हजार रुपैयाँ घुस लिने वडाध्यक्ष सबदुल मियाँ अख्तियार दुरुपयोग अनुसन्धान आयोगको फन्दामा परेका छन् ।

सप्तरीस्थित अग्निसाइर कृष्णासवरन गाउँपालिका वडा नं ५ का वडाध्यक्ष मियाँले सिफारिस दिनका लागि सेवाग्रहीसँग ५०हजार रुपैयाँ घुस मागेको उजुरी परेको थियो । उनले निर्माणाधीन भवनको अन्तिम किस्ता रकम भुक्तानीकोे लागि सिफारिस गरिदिने प्रयोजनमा घुस मागेका थिए ।

सोही उजुरीमाथि अनुसन्धान गर्दा आयोगले उनलाई उक्त रकम लिइसकेको अवस्थामा नियन्त्रणमा लिएको जनाएको छ ।

उनलाई उक्त रकमको बिगो जरिवानासहित कैदसजायको मागदाबी गर्दै आज विशेष अदालत काठमाडौंमा मुद्दा दायर भएको हो।