काठमाडौं । नेपाली कांग्रेसका महामन्त्री गगन थापाले पार्टीको आगामी १५ औं महाधिवेशनबाट दाइले भाउजूलाई टिकट दिने परिपाटी हटाउने घोषणा गरेका छन् ।

सिन्धुपाल्चोकको बाह्रबिसेमा आयोजित एक कार्यक्रमलाई सम्बोधन गर्दै महामन्त्री थापाले दाईले भाउजुलाई टिकट दिने प्रवृतिले सिंगो पार्टीपंति नै बदनाम भएको बताए ।

महामन्त्री थापाले ८ लाख सदस्य भएको कांग्रेस अहिले शिथिल बनेको बताए ।

‘तपाईंहरुलाई वडाको सभापति छान्ने अधिकार पार्टीको विधानले दिन्छ । तर, त्यही वडाको अध्यक्षको उम्मेदवार छान्नुपर्यो भने चाहिँ तपाईंको अधिकार खोसिएर त्योभन्दा माथि जान्छ । म महामन्त्री भएकाले अहिले टिकट बाँडेको नजिकबाट हेरें । पहिलो पटक म त्यहाँ सम्मिलित भएँ,’ थापाले भने ।

यस्तै उनले अहिले कांग्रेसभित्र विभेद र न्याय नभएपछि असन्तुष्टि बढेको गुनासो गरे । थापाले अब उम्मेदवार छान्दा स्थानीय नेता कार्यकर्ताबाटै छान्नुपर्नेमा जोड दिए ।