काठमाडौं । सरकारले कृषकहरूबाट उत्पादित धान तोकिएको न्यूनतन समर्थन मूल्यमा खरिद गर्ने सहकारीलाई व्यवस्थापन खर्च उपलब्ध गराउने भएको छ ।

कृषि तथा पशुपन्छी विकास मन्त्रालय मार्फत उपलब्ध गराइने उक्त व्यवस्थापन खर्चका लागि ईच्छुक सहकारी संस्थाहरुले जिल्लास्थित परियोजना कार्यान्वयन एकाइमा सूचीकृत हुनुपर्ने छ ।

कृषि तथा पशुपन्छी मन्त्रालय, प्रधानमन्त्री कृषि आधुनिकरण परियोजना व्यवस्थापन एकाइले आइतबार सार्वजनिक सूचना जारी गर्दै सो जानकारी गराएको हो ।

नेपाल सरकारले चालु आर्थिक वर्ष २०८०/८१ का लागि मोटा धानको प्रति क्विन्टल रु. ३१९८ र मध्यम धानको प्रति क्विन्टल रु. ३३६२ न्यूनतम मूल्य निर्धारण गरेको छ । ईच्छुक सहकारी संस्थाहरूले सोही मूल्यमा किसानबाट धान खरिद गर्नुपर्नेछ ।