काठमाडौं । आफ्ना उत्पादनलाई बजारमा नरुचाईएपछि न्यूप्लास्ट इन्डस्ट्रिज प्रा.लि. संकटमा परेको छ ।

आर्थिक गतिविधि सुस्त रहेको र आफ्नो कम्पनीको उत्पादनले बजार नआउँदा कम्पनी संकटग्रस्त रहेको न्यूप्लास्ट इन्डस्ट्रिज प्राइभेट लिमिटेडका कार्यकारी निर्देशक ऋषीराज मोरले बताए ।

लक्की ग्रुप अन्तरगत रहेर सन् २००० मा स्थापना भएको यो कम्पनीले UPVC पाइप र फिटिङ्स, CPVC पाइप र फिटिङ्स, PVC कम्पाउन्ड, रिजिड र कमर्शियल पाइप्स, कृषि पाइप्स, इलेक्ट्रिकल लिस्टी लगायत सामान उत्पादन गर्दै आएको थियो ।

अन्तराष्ट्रिय गुणस्तरको मान्यता पाएपनि यो कम्पनीले बजारमा अन्य कम्पनीको उत्पादनसँग प्रतिस्पर्धा गर्न सकेको छैन । बजारमा प्रतिस्पर्धी कम्पनीहरुसँग गुणस्तर र मूल्यमा प्रतिस्पर्धा गर्न नसक्दा कम्पनी अप्ठ्यारोमा परेको हो । यस्तो अवस्थामा देखापरेको आर्थिक मन्दीले थप असर पारेको कम्पनी स्रोतले जनाएको छ ।

न्यूप्लास्टको उत्पादन प्रयोग गरेर बनाइएका भवन तथा संरचनामा पानी चुहिने, घामका कारण फुट्ने र फिटिङमा समेत समस्या आएको भन्दै उपभोक्ताबाट गुनासा आइरहँदा कम्पनीले नै अप्ठ्यारोमा पुगेको जनाएको छ ।

आगामी दिनमा उत्पादनको गुणस्तर बृद्धि गर्न आवश्यक पुँजी लगानीमा समस्या रहेको, बजारले अहिलेको वस्तुलाई नरुचाएको कारण कम्पनी संकटमा पुगेको हो । कार्यकारी निर्देशक मोरले कम्पनी नै धराशायी भएकाले सबै खर्चहरु कटौती गर्न थालेको बताए ।