काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङलाई कार्यालय प्रवेशमा रोक लगाउने कर्मचारीहरूले आन्दोलन फिर्ता लिएका छन् ।

सात बुँदे माग राख्दै आन्दोलनमा उत्रिएका कर्मचारीहको प्राधिकरण व्यवस्थापनसँग सहमति भएसँगै आन्दोलन फिर्ता लिइसकेका छन् ।

आजको वार्ता पछि ट्रेड युनियनहरूको माग सम्बोधन गर्न उनीहरूको आधिकारिक प्रतिनिधि रहनेगरी जनसाधन विभाग निर्देशकको अध्यक्षतामा पाँच सदस्यीय कमिटी गठन गर्ने निर्णय भएको छ ।

सोही कमिटीले अध्ययनसहितको सिफारिस प्रतिवेदन कार्यकारी निर्देशक घिसिङलाई बुझाउने जनाएको छ । योसँगै प्राधिकरण व्यवस्थापनले गत ३० असोजमा भएको सरुवा काजको पनि पुनरावलोकन गर्ने सहमति भएको छ ।

प्राधिकरणका क्रियाशील कर्मचारी युनियन र नेपाल विद्युत प्राधिकरण कर्मचारी संघ कात्तिक १४ गतेदेखि आन्दोलनमा थिए । दुवै संगठन मिलेर आज कार्यकारी निर्देशक घिसिङलाई कार्यालय प्रवेशमा रोक लगाएका थिए ।