डडेल्धुरा । परराष्ट्रमन्त्री एनपी साउदले इजरायल-हमासबीचको दोस्रो युद्धविराममा कञ्चनपुरका विपिन जोशीको रिहाइ हुने विश्वास व्यक्त गरेका छन् ।

आज बिहान डडेल्धुरामा पत्रकारहरूसँगको कुराकानीमा मन्त्री साउदले विपिनको रिहाइका लागि पटक–पटक इजरायल सरकारसँग पनि आग्रह गरेको बताए ।

उनले भने, ‘कतारले दोस्रो युद्धविरामका लागि आफूहरु प्रयासरत रहेको जवाफ दिएको छ, दोस्रो युद्धविराममा विपिन सकुशल फर्किने अपेक्षा छ ।’ उनले कतारका प्रधानमन्त्री र विदेशमन्त्रीसँग पनि विपिन रिहाइको पहल गर्न आग्रह गरेको बताए ।

उनले भने, ‘पहिलो चरणमा महिला र बालिबालिका प्राथमिकतामा परेको र अब विपिनको रिहाइ हुनेमा आशावादी छौँ। विपिन सुरक्षित छन्। उनी चाँडै रिहा हुनेछन्।’