काठमाडौं । नयाँ सत्ता समीकरण बनेसँग चार दलबीच आठ बुँदे सहमति भएको छ । एमाले, माओवादी, राष्ट्रिय स्वतन्त्र पार्टी र जनता समाजवादी पार्टीभित्र लिखित समझदारी भएको हो ।

समझदारीअनुसार सरकारको नेतृत्व प्रचण्डले गर्ने उल्लेख छ । साथै, राष्ट्रिय सभाको अध्यक्ष माओवादी केन्द्र र उपाध्यक्ष एमालेले पाउने भएको छ ।

नयाँ सत्ता गठबन्धनमा नेकपा एकीकृत समाजवादी पनि सहभागी हुने सम्भावना छ । प्रधानमन्त्री पुष्पकमल दाहाल प्रचण्डले एकीकृत समाजवादीका अध्यक्ष माधव कुमार नेपाललाई भेटेर सरकारमा आउन आग्रह गरेका हुन् ।

प्रधानमन्त्री प्रचण्ड नेता नारायणकाजी श्रेष्ठलाई लिएर नेपाललाई भेट्न गएका थिए । भेटमा सरकारमा सहभागी हुन प्रचण्डले आग्रह गरेका थिए । नेता नेपालले पार्टीमा छलफल गर्ने बताएका छन् । स्रोतका अनुसार समाजवादी पनि सरकारमा जाने तयारीमा छ ।

प्रचण्डले कांग्रेससँगको गठबन्धन तोडेर एमालेसँग सहकार्य गरी नयाँ सरकार बनाउन लागेका हुन् । सोमबार प्रधानमन्त्रीले एमालेबाट पदम गिरी, माओवादीबाट हितबहादुर तामाङ र राष्ट्रिय स्वतन्त्र पार्टीबाट डिपी अर्याललाई मन्त्री नियुक्त गरेका छन् । तर, जिम्मेवारी भने तोकिएको छैन ।