काठमाडौं । एकीकृत समाजवादी पार्टी सुदरपश्चिम प्रदेश सरकारबाट बाहिरिएको छ । केन्द्रमा नयाँ सत्ता समीकरण बनेसँगै समाजवादी पार्टीबाट प्रतिनिधित्व गर्दै प्रदेश सरकारमा सहभागी भएका मन्त्रीहरू फिर्ता भएका हुन् ।

सुदूरपश्चिम प्रदेशसभामा चार सदस्य रहेको एकीकृत समाजवादीबाट प्रदेश सरकारमा कमलबहादुर शाही आर्थिक मामिला मन्त्रीको जिम्मेवारीमा थिए ।

मुख्यमन्त्रीको सचिवालयले बिहीबार बिहान मुख्यमन्त्री कमलबहादुर शाहसँग भेटेर सरकारबाट बाहिरिने निर्णय सुनाएको जनाएको छ ।

एकीकृत समाजवादीले सुदूरपश्चिम प्रदेश सरकारलाई दिएको समर्थन फिर्ता लिने निर्णय भने अहिलेसम्म गरेको छैन । सो पार्टीका एक नेताका अनुसार, यसबारे निर्णय लिन बिहीबार एकीकृत समाजवादीको संसदीय दलको बैठक बोलाइएको छ ।

यसअघि बुधबार नै सुदूरपश्चिम प्रदेश सरकारको साझेदार रहेको माओवादी केन्द्रले पनि समर्थन फिर्ता लिएको छ । समाजवादीले समेत बिहीबार सरकारबाट बाहिरिने जानकारी दिएकाले मुख्यमन्त्री शाह अल्पमतमा परेका छन् ।