काठमाडौं । नेपाली कांग्रेसको पदाधिकारी बैठक अहिले बसिरहेको छ । पार्टी सभापति शेरबहादुर देउवाको आह्वानमा उनको निवास बूढानीलकण्ठमा पदाधिकारी बैठक बसेको हो ।

संसदमा विकसित नयाँ घटनाक्रमबारे छलफल गर्न पदाधिकारी बैठक बोलाइएको कांग्रेसका एक नेताले जानकारी दिए ।

प्रतिनिधिसभाको हिउँदे अधिवेशन शुक्रबारबाट सुरु भएकोमा कांग्रेसले सहकारी ठगी प्रकरणमा मुछिएका उपप्रधान तथा गृहमन्त्री रवि लामिछानेमाथि छानबिन गर्न संसदीय समिति बनाउनु पर्ने माग राख्दै संसद अवरोध गरेको थियो । यसअघिको संसदको अधिवेशनमा पनि कांग्रेसले यही माग राखेर ससदको गतिविधिमा अवरोध गरेको थियो ।

उता लामिछानेले भने आफूमाथि लागेका अभियोगबारे संसदमा बोल्न दिनुपर्ने माग राखेका छन् । बजेट अधिवेशन सुरुअघि सभामुख देवराज घिमिरेले डाकेको संसदमा प्रतिनिधित्व गर्ने शीर्ष दलका नेताको बैठकमा कांग्रेसले आफ्ना नेता बोलेपछि लामिछानेलाई पनि बोल्न दिने सहमति गरेको थियो । तर अधिवेशनको पहिलो दिन शुक्रबार पूर्वप्रतिबद्धताविपरीत कांग्रेसले अवरोध गरेपछि कतिपयले संसदीय आचरणविपरीत कार्य भएको भन्दै कतिपयले कांग्रेसको आलोचना गरिरहेका छन् ।