काठमाडौं । प्रतिनिधिसभाको संसदीय सुनुवाइ समितिले प्रस्तावित प्रधानन्यायाधीश र राजदूतहरू विरुद्ध उजुरी आह्वान गरेको छ ।

प्रधानन्यायाधीश र राजदूतमा सिफारिस व्यक्तिविरुद्ध उजुरी आह्वान गरेर संसदीय सुनुवाइ गर्नुपर्ने संवैधानिक प्रबन्ध अनुसार संघीय संसदको संसदीय सुनुवाइ समितिले उजुरी आह्वान गरेको हो ।

समितिले उनीहरूविरुद्ध उजुरी दिन १० दिनको समय दिएको छ । समितिको कार्यालयमै गएर वा टेलिफोन तथा इमेलमार्फत उजुरी दिन सकिने सूचनामा उल्लेख छ ।

प्रमाणसहित उजुरी दिन भनेको समितिले उजुरीकर्ताले चाहेको खण्डमा परिचय गोप्य राखिने स्पष्ट पारेको छ ।

मन्त्रिपरिषद्को गत सोमबार सम्पन्न बैठकले प्रधानन्यायाधीशमा प्रकाशमान सिंह राउतको नाम सिफारिस गरेको थियो । प्रधानन्यायाधीश अवकाशमा जानुभन्दा एक महिनाअगावै नाम सिफारिस गर्नुपर्ने व्यवस्था भए पनि केही ढिलो गरी प्रधानन्यायाधीश विश्वम्भरप्रसाद श्रेष्ठपछिको वरीयतामा रहेका राउतको नाम सिफारिस भएकाे हो । श्रेष्ठ आगामी असोज १८ बाट अवकाशमा जाँदैछन् ।

त्यस्तै, मन्त्रिपरिषद्बाट बेल्जियमको राजदूतमा सेवा लम्साल र अस्ट्रेलियाको राजदूतमा चित्रलेखा यादवको नाम सिफारिस गरिएको थियो । लम्साल परराष्ट्र मन्त्रालयको बहालवाला सचिव हुन् भने यादव कांग्रेसको नेत्री हुन् ।