दमौली । देवघाट गाउँपालिका–३ का विभिन्न स्थानमा सुन्तलाका बगैंचामा लटरम्म फल लागेका छन् । तर तिनमा रोग लागेकाले किसान चिन्तित छन् । उनीहरूको आम्दानीको मुख्य स्रोत नै सुन्तला हो ।

सुन्तला बगैँचा लगाएका भीमबहादुर थापाले जरा कुहिने र बोक्रा सुक्दै जाने तथा बेमौसममा पहेँलो भएर झर्ने समस्या सुन्तलामा देखिएको बताए । रोगको अनुसन्धान गरी निदान पहिल्याउन उनले स्थानीय सरकारसँग माग गरे ।

बगैँचामा लटरम्म फलेका सुन्तलाबाट गर्जो टार्ने सोच बनाएका भरतसिंह मगर त्यसमा रोगव्याध लागेपछि चिन्तित छन् । सुन्तला बेचेर घरखर्च टार्ने र घरव्यवहार मिलाउने आफ्ना योजना भताभुङ्ग भएको दुखेसो उनले गरे ।

तनहुँको लुङग्रिङ, छिपछिपे, छापस्वाँरा, दगरामा उत्पादित सुन्तला स्थानीय तहमा मात्र नभई काठमाडौँ उपत्यकामा पनि खपत हुने गरेको छ । गत वर्ष लुङग्रिङ गाउँबाट रु तीन करोडभन्दा बढीको सुन्तला उत्पादन भएको कृषि ज्ञान केन्द्रले जनाएको छ ।