काठमाडौं । आगामी १६ मंसिरमा हुने उपनिर्वाचनमा काठमाडौं महानगरपालिका मेयर बालेन्द्र(बालेन) शाहले पनि आफु निकटहरूलाई चुनाव लडाउने तयारी गरेका छन् । पार्टी दर्ता नगरेपनि स्वतन्त्र उम्मेदवार उठाउने उनको तयारी छ ।

केही सहरी क्षेत्रमा उनले उम्मेदवार छान्न छलफल गरिरहेको स्रोत बताउँछ ।
कीर्तिपुरको मेयर पदमा स्वतन्त्र उम्मेदवारी दिने निर्णय गरेका राजमान मानवले आफु बालेनको समर्थनमा उम्मेदवार बन्न लागेको बताएका छन् । बालेनको सचिवालयसँग कुरा भइरहेको उनले बताए । धरानका मेयर हर्क साम्पाङले भने आफुलाई समर्थन दिइसकेको उनको दाबी छ ।

त्यस्तै, काठमाडौं महागनरपालिका १६ मा पनि बालेनको समर्थनमा चुनाव लडाउने तयारी भइरहेको छ । तर, उम्मेदवार तय भइसकेको छ । बालेन निकट रहेका रुटिन अफ नेपाल बन्दका सञ्चालक भिक्टर पौडेलको समेत नाम चर्चामा छ । केही कलाकारहरुसँग पनि बालेनको टिमले सल्लाह गरिरहेको स्रोत बताउँछ ।

साढे दुई वर्षअघिको निर्वाचनमा काठमाडौं महानगरपालिकाको मेयरमा स्वतन्त्र उम्मेदवारका रुपमा बालेनले अप्रत्याशित जित हात पारेका थिए । उनी लौरो चुनाव चिन्ह लिएर लडेका थिए । तर, उनका उम्मेदवारले भने रोजेअनुसारको चुनाव चिन्ह पाउने छैन । निर्वाचन कार्यालयले स्वतन्त्र उम्मेदवारहरुको चुनाव चिन्ह तय गर्दछ ।