काठमाडौं । फिफा विश्वकप फुटबल छनोटमा पाराग्वेसँग अर्जेन्टिना पराजित भएको छ । दक्षिण अमेरिका छनोटअन्तर्गत शुक्रबार बिहान भएको खेलमा अर्जेन्टिना २–१ गोल अन्तरमा पराजित बनेको हो ।

पाराग्वेसँग पराजित भए पनि अर्जेन्टिना अंक तालिकामा भने शीर्ष स्थानमा छ ।

शुक्रबार बिहान सम्पन्न खेलमा अर्जेन्टिनाले सुरुआती अग्रता बनाएको थियो । तर त्यसलाई जोगाउन नसक्दा हार व्यहोर्यो ।

अर्जेन्टिनाका लागि लाउतारो मार्टिनेजले ११औं मिनेटमा गोल गर्दै अग्रता बनाएकोमा १९औं मिनेटमा पाराग्वेका एन्टिनियो सानाब्रियाले गोल गर्दै टिमलाई खेलमा फर्काए ।

त्यसपछि दोस्रो हाफको ४७औं मिनेटमा ओमार अल्डेरेटेले गोल गर्दै पाराग्वेलाई अग्रता दिलाए । तर त्यसपछि अर्जेन्टिनाले गोलको अवसर पाएको भए पनि त्यसलाई सदुपयोग गर्न सकेन ।

योसँगै अर्जेन्टिना ११ खेलबाट २२ अंक जोड्दै शीर्ष स्थानमा छ भने पाराग्वे १६ अंकका साथ छैटौं स्थानमा छ ।