काठमाडौं । भारतको महाराष्टमा बुधबार  भएको पुष्पक एक्सप्रेसको रेल दुर्घटनामा ज्यान गुमाएका १३ मध्ये ४ नेपाली रहेको पुष्टि भएको छ ।

भारतीय सञ्चारमाध्यमहरूले सरकारी अधिकारीलाई उद्धृत गर्दै ४ नेपालीको सनाखत भएको जनाएका छन् । ज्यान गुमाउनेहरूमा  लछिराम पासी, नन्दराम विश्वकर्मा, कमला भण्डारी र हिमु विश्वकर्मा छन् ।

मृतक १३ मध्ये ६ जनाको अझै सनाखत हुन सकेको छैन ।

बुधबार पुष्पक एक्सप्रेसको रेल चलिरहेका बेला त्यसमा आगलागी भएको अफवाह फैलिएको थियो । त्यसपछि एक यात्रुले आकस्मिक रूपमा रेल रोक्न प्रयोग गरिने सिक्री तानेका थिए । रेल रोकिएपछि यात्रुहरू अर्को लिकतर्फ भाग्ने क्रममा विपरीत दिशाबाट आएको रेलको ठक्करबाट १३ जनाको मृत्यु भएको थियो । रेल मोडमा रोकिएका कारणले पनि ठूलो मानवीय क्षति हुन पुगेको बताइएको छ ।