काठमाडौं । तामाङ समुदायले आज आफ्नो नयाँ वर्ष ल्होछार मनाउँदै छन् । ल्होछार हरेक वर्ष माघ शुक्ल प्रतिपदाका दिन मनाइन्छ ।

सोनाम ल्होछार मुसा, गाई, बाघ, खरायो, ड्रागन , सर्प, घोडा, भेडा, बाँदर, चरा, कुकुर र सुँगुर गरी १२ वर्गमा विभाजन गरिएको छ ।

१२ वटा जीवजन्तुका नामबाट ल्हो खोर्लो अर्थात् वर्ष चक्रका आधारमा हरेक वर्ष पुरानो वर्षलाई बिदाइ र नयाँ वर्षलाई स्वागत गरी धार्मिक र सांस्कृतिक विधिअनुसार ल्होछार पर्व मनाइन्छ ।

ल्होछार पर्वमा तामाङ समुदायले भूमिपूजा, कूलपूजा एवं दानदक्षिणा, ढोगभेट, नाचगान, मिठो परिकार बनाएर खाने र शुभकामना आदानप्रदान गर्ने प्रचलन छ ।

यो पर्व तामाङका अतिरिक्त ह्योल्मो, थकाली, जिरेल, नेस्याङ्वा, भोटे, दुरा, लेप्चालगायतले पनि मनाउने गरेका छन् ।

ल्होछारका अवसरमा विगत वर्षजस्तै यस वर्ष पनि विविध कार्यक्रमहरू आयोजना गरिएका छन् । तामाङ जातिको बाहुल्य रहेको बागमती प्रदेशका विभिन्न जिल्लामा यो पर्व विशेष रुपमा मनाइन्छ । राजधानीको टुँडिखेल, बौद्ध, स्वयम्भू क्षेत्रमा विविध कार्यक्रम आयोजना गरिएको छ ।