काठमाडौं । राष्ट्रिय प्रजातन्त्र पार्टी (राप्रपा), राष्ट्रिय प्रजातन्त्र पार्टी, नेपाललगायत राजावादी दल र संगठनले आइतबार राजसंस्था पुनर्स्थापनाको पक्षमा प्रदर्शन गर्न लागेका छन् ।

पूर्वराजा ज्ञानेन्द्र शाह पोखराको एक साता लामो बसाइ सकेर आइतबार दिउँसो ३ बजे त्रिभुवन अन्तर्राष्ट्रिय विमानस्थल हुँदै काठमाडौं फर्कंदैछन् । सोही कार्यक्रमको छेको पारेर राजावादीहरूले उनको समर्थनमा प्रदर्शन गर्न लागेका हुन् ।

विमानस्थलमा दिउँसो ३ बजे ओर्लने पूर्वराजा ज्ञानेन्द्रलाई त्यहाँ स्वागत गरेर नाराबाजी गर्दै निर्मल निवास पु–याउने राजावादीहरूको कार्यक्रम छ । त्यसअघि उनीहरूले विभिन्न स्थानबाट जुलुस तथा –याली निकाल्दैछन् ।

काभ्रे, भक्तपुर, ललितपुर, कीर्तिपुर, नागार्जुनबाट दिउँसो –याली निकालिनेछ । ती सबै स्थानबाट निकालिएका र्‍याली तिनकुने हुँदै विमानस्थलतर्फ अगाडि बढ्ने छ ।

त्यसैगरी गोकर्णेश्वर, कागेश्वरी, शंखरापुर, बूढानीलकण्ठ, तारकेश्वर, धादिङ र नुवाकोटबाट पनि पूर्वराजाका समर्थकहरू प्रदर्शनमा उत्रँदैछन् । यो क्षेत्रबाट निस्कने जुलुसलाई महाराजगञ्ज, चाबहिल हुँदै गौशालामा भेला गराउने र त्यहाँबाट विमानस्थलतर्फ अगाडि बढाउने तयारी छ ।

यसका अतिरिक्त कलंकी, बल्खु, जावलाखेल, चापागाउँ, च्यासललगायत स्थानबाट पनि –याली निकालिनेछ ।

राजाका पक्षमा वहृत् प्रदर्शनको तयारी अघि बढाइएपछि सरकारले आइतबार बिहानैदेखि काठमाडौं उपत्यकाको सुरक्षा व्यवस्था कडा पारेको छ ।