काठमाडौं । नबिल बैंकको कामु प्रमुख कार्यकारी अधिकृतमा मनोज ज्ञवाली नियुक्त भएका छन् ।

नबिल बैंक सीइओ ज्ञानेन्द्र ढुंगानाले राजीनामा दिएपछि सञ्चालक समितिले ज्ञवालीलाई कामु सीइओको जिम्मेवारी दिएको हो । यसअघि उनी नबिल बैंकमा डेपुटी सिईओको जिम्मेवारीमा थिए ।

काे हुन उनी ? 

कर्णाली प्रदेश, दैलेख जिल्लाको ग्रामीण भेगमा २०३४ साल वैशाखमा जन्मिएका ज्ञवाली अढाइ दशकभन्दा बढी बैंकिङ र अडिटिङ क्षेत्रमा सक्रिय चार्टर्ड अकाउन्टेन्ट हुन् । ज्ञवालीले पाँच वर्ष नेपाल राष्ट्र बैंकमा काम गरेका छन्। त्यसपश्चात् सात वर्ष ग्लोबल आइएमई बैंकमा बिताएका उनले त्यहाँ रहँदा ब्राञ्च म्यानेजरका अलावा चिफ फाइनान्सियल अफिसर र चिफ अपरेटिङ अफिसर जस्तो महत्वपूर्ण जिम्मेवारीसमेत निर्वाह गरेका थिए ।

ज्ञवालीले ग्लोबल आइएमई क्यापिटलमा संचालक तथा प्रबन्ध संचालकको अनुभव पनि लिएका छन् । त्यस्तै उनले दुई वर्ष डिसिईओ र दुई वर्ष सिईओ भएर ज्योति विकास बैंकको नेतृत्व पनि गरेका छन् ।

यसबाहेक उनीसँग विभिन्न कलेजहरूमा पढाएको अनुभव पनि छ । ग्लोबल कलेज अफ म्यानेजमेन्ट, ब्रिटिस कलेज, नेपाल कलेज अफ म्यानेजमेन्ट, काठमाडौं कलेज अफ म्यानेजमेन्टलगायत उनले अध्यापन गरेमध्येका कलेजहरू हुन् ।

भारतस्थित द इन्स्टिट्युट अफ चार्टड अकाउन्टेन्सबाट सिए पास गरेका ज्ञवाली विभिन्न अवार्डहरुबाट सम्मानित भएका छन् । उनी दैलेखको प्रथम चार्टर्ड एकाउन्टेन्टको रूपमा दैलेख सेवा समाजद्वारा सम्मानित भएका छन् । त्यस्तै उनी फोकस नेपालद्वारा ‘राष्ट्रिय सेवा सम्मान २०७४’, नागरिक एकता समाजद्वारा ‘आर्थिक सेवा सम्मान-२०७५’, बैंकिङ लिडरसीप अवार्ड २०७४ बाट सम्मानित भएका छन् ।